chaara-gar sab ke paas jaataa thaa — Ajay Sahaab

ek muddat se dhadhaktaa rahaa meraa ye zehn
tab kahin jaa ke farozaan hue lafzon ke charaagh

aise sulag uThaa tiri yaadon se dil miraa
jaise dhadhak uThein kahin jangal chinaar ke

fan jo meaar tak nahin pahunchaa
apne shahkaar tak nahin pahunchaa

kaash lauTein mire paapaa bhi khilaune le kar
kaash phir se mire haathon mein khazaana aae

haadse jaan to lete hain magar sach ye hai
haadse hi hamein jiinaa bhi sikhaa dete hain

jab bhi milte hain to jiine ki duaa dete hain
jaane kis baat ki vo ham ko sazaa dete hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

ret par ik nishaan hai shaayad
ye hamaaraa makaan hai shaayad

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

gham hai na ab khushi hai na ummid hai na yaas
sab se najaat paae zamaane guzar gae

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein