jab chheDti hain un ko gumnaam aarzuein — Ali Jawad Zaidi

ye dushmani hai saaqi yaa dosti hai saaqi
auron ko jaam denaa mujh ko dikhaa dikhaa ke

guftugu ke khatm ho jaane par aayaa ye khayaal
jo zabaan tak aa nahin paayaa vahi to dil mein thaa

jin hauslon se meraa junun mutmain na thaa
vo hausle zamaane ke meyaar ho gae

lazzat-e-dard mili ishrat-e-ehsaas mili
kaun kahtaa hai ham us bazm se naakaam aae

ab dard mein vo kaifiyat-e-dard nahin hai
aayaa huun jo us bazm-e-gul-afshaan se guzar ke

jab kabhi dekhaa hai ai 'zaidi' nigaah-e-ghaur se
har haqiqat mein mile hain chand afsaane mujhe

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

nazaa mein us ne is andaaz se dekhaa mujh ko
marte marte hui jiine ki tamannaa mujh ko

aaghaaz se zaahir hotaa hai anjaam jo hone vaalaa hai
andaaz-e-zamaana kahtaa hai puuri ho tamannaa mushkil hai

rahi na taaqat-e-guftaar aur agar ho bhi
to kis umiid pe kahiye ki aarzu kyaa hai

nai khvaahish rachaai jaa rahi hai
tiri furqat manaai jaa rahi hai