ai aasmaan kis liye is darja barhami — Ambareen Haseeb Ambar

jo tum ho to ye kaise maan luun main
ki jo kuchh hai yahaan bas ik gumaan hai

duniyaa to ham se haath milaane ko aai thi
ham ne hi eatibaar dobaara nahin kiyaa

is aarzi duniyaa mein har baat adhuri hai
har jiit hai laa-haasil har maat adhuri hai

ham to sunte the ki mil jaate hain bichhDe hue log
tu jo bichhDaa hai to kyaa vaqt ne gardish nahin ki

faisla bichhaDne kaa kar liyaa hai jab tum ne
phir miri tamannaa kyaa phir miri ijaazat kyuun

taalluq jo bhi rakkho soch lenaa
ki ham rishta nibhaanaa jaante hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa