basaa-auqaat hurmat bhi qalam ki daav par rakh di — Ameerul Islam Hashmi

bahut mushkil thaa jin ko DhunDnaa make-up ke malbe se
so andaaze se un kaa baankpan likhnaa paDaa mujh ko

chhoDaa hai jab se parda mardaa gai hai aurat
radd-o-badal hai kyaa kyaa ye arz phir karungaa

zulekhaaein ba-zid thiin ek yusuf ke liye yaaro
baDi hi garmi-e-baazaar thi kal shab jahaan main thaa

miri majburiyon ne naazuki kaa khuun kar Daalaa
har ik gobhi-badan ko gul-badan likhnaa paDaa mujh ko

pata mushkil se chaltaa hai muzakkar aur muannas kaa
kabhi maalum hotaa hai kabhi maalum hoti hai

hamaari umr ab aisi hai ham siiTi nahin sunte
rukaa karte the khush ho kar kabhi siiTi bajaane par

hai ajab nizaam zakaat kaa mire mulk mein mire des mein
ise kaaTtaa koi aur hai ise baanTtaa koi aur hai

qurbatein hote hue bhi faaslon mein qaid hain
kitni aazaadi se ham apni hadon mein qaid hain

'ajib Dhang se mujh ko mili hai aazaadi
parinda pinjre mein pinjra havaa mein rakkhaa gayaa

hamaaraa mulk agar qarze mein jakDaa hai to kyaa hairat
hamaare mulk kaa to ik vazir-e-aazam udhaaraa thaa

kitnaa shaatir hai siyaasat-daan apne mulk kaa
aur bhi maqbul ho jaataa hai badnaami ke baa'd

mulk to mulk gharon par bhi hai qabza us kaa
ab to ghar bhi nahin chalte hain siyaasat ke baghair