sahife fikr-o-nazar ke jo de gae tartib — Anwar Minai

har dam duaa-e-aab-o-havaa maangte rahe
nange darakht sabz qabaa maangte rahe

divaangi ki aisi milegi kahaan misaal
kaanTe khaaridtaa huun gulaabon ke shahr mein

is ahd mein rishton ki be-rang dukaanon mein
hiire se bhi mahngaa hai vishvaas kaa aaina

khvaab bikhreinge to ham ko bhi bikharnaa hogaa
shab ki ik ek aziyyat se guzarnaa hogaa

laakh suraj ki inaayaat rahein mere saath
meraa saaya na mire qad ke baraabar phailaa

utraa thaa meri ruuh ke rauzan se jo kabhi
ghuT ghuT ke mere jism mein marne lagaa hai vo

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ujaalaa 'ilm kaa phailaa to hai chaaron taraf yaaro
basirat aadmi ki kuchh magar kam hoti jaati hai

aarzu thi ek din tujh se milun
mil gayaa to sochtaa huun kyaa karun

tumhaari bazm se nikle to ham ne ye sochaa
zamin se chaand talak kitnaa faasla hogaa

us ne do lafz mein jo baatein kahin thi mujh se
us ko main sochne baiThun to zamaane lag jaaein