ik 'umr se ulfat ke kaTahre mein khaDaa hai — Arshi Malik

sab ke sab mil kar bhi mujh ko zer kar sakte na the
meraa apnaa haath shaamil hai miri paspaai mein

tu chhuDaa kar haath ik din daf'atan kho jaaegaa
aur meri jeb mein teraa pata rah jaaegaa

kuud kar divaar 'arshi' gham gharon mein aa base
anginat taa'viz darvaazon pe laTke rah gae

kisi ke lahje ki yakh-bastagi qayaamat thi
ThiThur ke rah gayaa lab par savaal kaa mausam

ik lafz bhi na lab se kahaa aur ro diye
'arshi' uThaae dast-e-du'aa aur ro diye

lab-e-khaamosh mein hi jaa-e-amaan aaj bhi hai
varna kahne ko to har munh mein zabaan aaj bhi hai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

jaane kitne Dubne vaale saahil par bhi Duub gae
pyaare! tufaanon mein rah kar itnaa bhi ghabraanaa kyaa

mujhe to ishq hai phulon mein sirf khushbu se
bulaa rahi hai kisi laala ki mahak mujh ko

haan ye mumkin hai magar itnaa zaruri bhi nahin
jo koi pyaar mein haaraa vahi fankaar huaa

main ne bas itnaa hi likhaa i-love-you aur phir
us ne aage kar diyaa thaa gaal internet par