ye dil mein vasvasa kyaa pal rahaa hai — Asif Raza

bhuul baiThaa huun main zamaane ko
ab zamaana bhi bhuul jaae mujhe

teraa meraa hai gumaan kaa rishta
tu hai meri tiri ijaad huun main

aansuon ko fuzul mat samjho
ye baDe qimti sahaare hain

ajnabi mujh se aa gale mil le
aaj ik dost yaad aae mujhe

jatan to khuub kiye us ne Taalne ke magar
main us ki bazm se us ke javaab tak na uThaa

ye miri bazm nahin hai lekin
dil lagaa hai to lagaa rahne do

main baDaa ho gayaa huun magar bachpanaa
mere dil se kabhi bhi gayaa hi nahin

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein

'saif' andaaz-e-bayaan rang badal detaa hai
varna duniyaa mein koi baat nai baat nahin

dil se aati hai baat lab pe 'hafiz'
baat dil mein kahaan se aati hai