main puchh letaa huun yaaron se rat-jagon kaa sabab — Athar Nasik

kitne maani rakhtaa hai zaraa ghaur to kar
kuza-gar ke haath mein honaa miTTi kaa

suraj lihaaf oDh ke soyaa tamaam raat
sardi se ik parinda dariche mein mar gayaa

na-jaane kaun si majburiyaan hain jin ke liye
khud apni zaat se inkaar karnaa paDtaa hai

yaqin barson kaa imkaan kuchh dinon kaa huun
main tere shahr mein mehmaan kuchh dinon kaa huun

main use subh na jaanun jo tire sang nahin
main use shaam na maanun ki jo tere bin hai

banaanaa paDtaa hai apne badan ko chhat apni
aur apne saae ko divaar karnaa paDtaa hai

jab ki pahlu se yaar uThtaa hai
dard be-ikhtiyaar uThtaa hai

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

jo ghair the vo isi baat par hamaare hue
ki ham se dost bahut be-khabar hamaare hue

barseingi aaj rahmatein aamad hai yaar ki
naayaab hain ye ghaDiyaan tire intizaar ki