ham bhaTakte rahe andhere mein — Bekal Utsahi

har ek lahza miri dhaDkanon mein chubhti thi
ajiib chiiz mire dil ke aas-paas rahi

chaandi ke gharondon ki jab baat chali hogi
miTTi ke khilaunon se bahlaae gae honge

biich saDak ik laash paDi thi aur ye likkhaa thaa
bhuuk mein zahrili roTi bhi miThi lagti hai

log to jaa ke samundar ko jalaa aae hain
main jise phunk kar aayaa vo miraa ghar niklaa

khudaa kare miraa munsif sazaa sunaane par
miraa hi sar mire qaatil ke ru-ba-ru rakh de

yuun to kai kitaabein paDhin zehn mein magar
mahfuz ek saada varaq der tak rahaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

pyaaso raho na dasht mein baarish ke muntazir
maaro zamin pe paanv ki paani nikal paDe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe