haath se mere vo piitaa nahin muddat se sharaab — Ghamgeen Dehlvi

vo lutf uThaaegaa safar kaa
aap-apne mein jo safar karegaa

jaam le kar mujh se vo kahtaa hai apne munh ko pher
ru-ba-ru yuun tere mai piine se sharmaate hain ham

mujhe jo dosti hai us ko dushmani mujh se
na ikhtiyaar hai us kaa na meraa chaaraa hai

meri ye aarzu hai vaqt-e-marg
us ki aavaaz kaan mein aave

kiyaa badnaam ik aalam ne 'ghamgin' paak-baazi mein
jo main teri tarah se bad-nazar hotaa to kyaa hotaa

koi samjhaao unhein bahr-e-khudaa ai momino
us sanam ke ishq mein jo mujh ko samjhaate hain log

jab ki pahlu se yaar uThtaa hai
dard be-ikhtiyaar uThtaa hai

ai be-khudi Thahr ki bahut din guzar gae
mujh ko khayaal-e-yaar kahin DhunDtaa na ho

divaane chaahtaa hai agar vasl-e-yaar ho
teraa baDaa raqib hai dil is se raah rakh

naakhun-e-yaar se bhi khul na saki
daana-e-ashk ki girah ai chashm

allaah re husn-e-dost ki aaina-daariyaan
ahl-e-nazar ko naqsh-ba-divaar kar diyaa

aks-e-khayaal-e-yaar sanvaaraa kareinge ham
shishe mein aaine ko utaaraa kareinge ham