Shayari Of Josh Malihabadi

kisī kā ahd-e-javānī meñ pārsā honā
qasam ḳhudā kī ye tauhīn hai javānī kī

ik na ik zulmat se jab vābasta rahnā hai to 'josh'
zindagī par sāya-e-zulf-e-pareshāñ kyuuñ na ho

kashtī-e-mai ko hukm-e-ravānī bhī bhej do
jab aag bhej dī hai to paanī bhī bhej do

aaḌe aayā na koī mushkil meñ
mashvare de ke haT ga.e ahbāb

vo kareñ bhī to kin alfāz meñ terā shikva
jin ko terī nigah-e-lutf ne barbād kiyā

fuġhāñ ki mujh ġharīb ko hayāt kā ye hukm hai
samajh har ek raaz ko magar fareb khaa.e jā

kaam hai merā taġhayyur naam hai merā shabāb
merā na.ara inqilāb o inqilāb o inqilāb

har ek kāñTe pe surḳh kirneñ har ik kalī meñ charāġh raushan
ḳhayāl meñ muskurāne vaale tirā tabassum kahāñ nahīñ hai

insān ke lahū ko piyo izn-e-ām hai
añgūr kī sharāb kā piinā harām hai

is dil meñ tire husn kī vo jalvagarī hai
jo dekhe hai kahtā hai ki shīshe meñ parī hai

guzar rahā hai idhar se to muskurātā jā
charāġh-e-majlis-e-rūhāniyāñ jalātā jā

aap se ham ko ranj hī kaisā
muskurā dījiye safā.ī se