apni tasvir ke ik rukh ko nihaan rakhtaa hai — Ghulam Murtaza Rahi

dekhne sunne kaa maza jab hai
kuchh haqiqat ho kuchh fasaana ho

hisaar-e-jism miraa toD-phoD Daalegaa
zarur koi mujhe qaid se chhuDaa legaa

ab aur der na kar hashr barpaa karne mein
miri nazar tire didaar ko tarasti hai

chale the jis ki taraf vo nishaan khatm huaa
safar adhuraa rahaa aasmaan khatm huaa

har ek saans mujhe khinchti hai us ki taraf
ye kaun mere liye be-qaraar rahtaa hai

sahraa jangal saagar parbat
in se hi rasta miltaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

main paa sakaa na kabhi is khalish se chhuTkaaraa
vo mujh se jiit bhi saktaa thaa jaane kyuun haaraa

aate hue is tan mein na jaate hue tan se
hai jaan-e-makin ko na lagaavaT na rukaavaT