Mir Taqi Mir

kitnī bāteñ banā ke lā.ūñ lek
yaad rahtīñ tire huzūr nahīñ

shaam se kuchh bujhā sā rahtā huuñ
dil huā hai charāġh muflis kā

dil se shauq-e-ruḳh-e-nikū na gayā
jhāñknā-tāknā kabhū na gayā

mat sahl hameñ jaano phirtā hai falak barsoñ
tab ḳhaak ke parde se insān nikalte haiñ

'mīr'-sāhib zamāna nāzuk hai
donoñ hāthoñ se thāmiye dastār

sabz hotī hī nahīñ ye sarzamīñ
tuḳhm-e-ḳhvāhish dil meñ tū botā hai kyā

dikhā.ī diye yuuñ ki be-ḳhud kiyā
hameñ aap se bhī judā kar chale

bevafā.ī pe terī jī hai fidā
qahr hotā jo bā-vafā hotā

phuul gul shams o qamar saare hī the
par hameñ un meñ tumhīñ bhaa.e bahut

kyā āj-kal se us kī ye be-tavajjohī hai
muñh un ne is taraf se pherā hai 'mīr' kab kā

dil se ruḳhsat huī koī ḳhvāhish
girya kuchh be-sabab nahīñ aatā

yahī jaanā ki kuchh na jaanā haa.e
so bhī ik umr meñ huā ma.alūm

maiñ jo bolā kahā ki ye āvāz
usī ḳhāna-ḳharāb kī sī hai

nāhaq ham majbūroñ par ye tohmat hai muḳhtārī kī
chāhte haiñ so aap kareñ haiñ ham ko abas badnām kiyā

de ke dil ham jo ho ga.e majbūr
is meñ kyā iḳhtiyār hai apnā

kaash us ke rū-ba-rū na kareñ mujh ko hashr meñ
kitne mire savāl haiñ jin kā nahīñ javāb

chashm ho to ā.īna-ḳhāna hai dahr
muñh nazar aatā hai dīvāroñ ke biich

kaifiyyateñ attār ke lauñDe meñ bahut thiiñ
is nusḳhe kī koī na rahī haif davā yaad

yuuñ nākām raheñge kab tak jī meñ hai ik kaam kareñ
rusvā ho kar mar jāveñ us ko bhī badnām kareñ

ishq ik 'mīr' bhārī patthar hai
kab ye tujh nā-tavāñ se uThtā hai