jab bhi ye dil udaas hotaa hai — Gulzar

aap ne auron se kahaa sab kuchh
ham se bhi kuchh kabhi kahin kahte

aaina dekh kar tasalli hui
ham ko is ghar mein jaantaa hai koi

shaam se aankh mein nami si hai
aaj phir aap ki kami si hai

aadatan tum ne kar diye vaade
aadatan ham ne e'tibaar kiyaa

aap ke baa'd har ghaDi ham ne
aap ke saath hi guzaari hai

kabhi to chaunk ke dekhe koi hamaari taraf
kisi ki aankh mein ham ko bhi intizaar dikhe

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

us kaa kyaa hai tum na sahi to chaahne vaale aur bahut
tark-e-mohabbat karne vaalo tum tanhaa rah jaaoge

na to ranj-o-gham se hi rabt hai na hi aashnaa-e-khushi huun main
miri zindagi bhi ajiib hai ise manzilon kaa pataa nahin

shaam paDte hi kisi shakhs ki yaad
kucha-e-jaan mein sadaa karti hai