jo mere paas thaa sab luuT le gayaa koi — Hakeem Manzoor

giregi kal bhi yahi dhuup aur yahi shabnam
is aasmaan se nahin aur kuchh utarne kaa

teri aankhon mein aansu bhi dekhe hain
tere haathon mein dekhaa hai khanjar bhi

reza reza raat bhar jo khauf se hotaa rahaa
din ko saanson par abhi tak bojh us patthar kaa hai

dekhte hain dar-o-divaar harifaana mujhe
itnaa be-bas bhi kahaan hogaa koi ghar mein kabhi

shahr ke aaiin mein ye mad bhi likkhi jaaegi
zinda rahnaa hai to qaatil ki sifaarish chaahiye

ham kisi bahrupiye ko jaan lein mushkil nahin
us ko kyaa pahchaaniye jis kaa koi chehraa na ho

mujhe ye Dar hai tiri aarzu na miT jaae
bahut dinon se tabiat miri udaas nahin

fitrat mein aadmi ki hai mubham saa ek khauf
us khauf kaa kisi ne khudaa naam rakh diyaa

javaab aae na aae shikan to aaegi
savaal puchh hi lenaa agarche Darte hue

ajnabiyyat ki jhalak dekhi gai lahje mein
baat Darne ki hai is baat pe Dar jaaiye naa

gardan jhuki hui hai uThaate nahin hain sar
Dar hai unhein nigaah laDegi nigaah se

leaderi chaaho to lafz-e-qaum hai mehmaan-navaaz
gap-navison ko aur ahl-e-mez ko raazi karo