tujh se bichhaD ke samt-e-safar bhulne lage — Hasan Abbas Raza

dhaDakti qurbaton ke khvaab se jaage to jaanaa
zaraa se vasl ne kitnaa akelaa kar diyaa hai

judaai ki ruton mein suratein dhundlaane lagti hain
so aise mausamon mein aaina dekhaa nahin karte

kyaa shakhs thaa uDaataa rahaa umr bhar mujhe
lekin havaa se haath milaane nahin diyaa

savaal ye nahin mujh se hai kyuun gurezaan vo
savaal ye hai ki kyuun jism o jaan se baahar hai

bachchon ke saath aaj use dekhaa to dukh huaa
un mein se koi ek bhi maan par nahin gayaa

sivaa tere har ik shai ko haTaa denaa hai manzar se
aur is ke baa'd khud ko be-sar-o-saamaan karnaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

yaad aai hai to phir TuuT ke yaad aai hai
koi guzri hui manzil koi bhuli hui dost

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

dasht ki naa-tamaam raahon par
koi saathi hai to shajar tanhaa