dhaDakti qurbaton ke khvaab se jaage to jaanaa — Hasan Abbas Raza

judaai ki ruton mein suratein dhundlaane lagti hain
so aise mausamon mein aaina dekhaa nahin karte

kyaa shakhs thaa uDaataa rahaa umr bhar mujhe
lekin havaa se haath milaane nahin diyaa

savaal ye nahin mujh se hai kyuun gurezaan vo
savaal ye hai ki kyuun jism o jaan se baahar hai

bachchon ke saath aaj use dekhaa to dukh huaa
un mein se koi ek bhi maan par nahin gayaa

mohabbatein to faqat intihaaein maangti hain
mohabbaton mein bhalaa e'tidaal kyaa karnaa

sivaa tere har ik shai ko haTaa denaa hai manzar se
aur is ke baa'd khud ko be-sar-o-saamaan karnaa hai

ek din naqsh-e-qadam par mire ban jaaegi raah
aaj sahraa mein to tanhaa huun kahin koi nahin

maidaan mein akelaa nihatthaa khaDaa thaa main
dushman ko meri nekiyaan lashkar dikhaai diin

tere baare mein jab sochaa nahin thaa
main tanhaa thaa magar itnaa nahin thaa

log phirte hain bhare shahr ki tanhaai mein
sard jismon ki salibon pe uThaa kar chehre

jiyaa huun umr bhar main bhi akelaa
use bhi kyaa milaa naaraazgi se

shab-e-firaaq ki tanhaaiyon mein teraa khayaal
mire vajud se kartaa rahaa judaa mujh ko