ham raaton ko uTh uTh ke jin ke liye rote hain — Hasrat Jaipuri

divaar hai duniyaa ise raahon se haTaa de
har rasm-e-mohabbat ko miTaane ke liye aa

kahin vo aa ke miTaa dein na intizaar kaa lutf
kahin qubul na ho jaae iltijaa meri

khudaa jaane kis kis ki ye jaan legi
vo qaatil adaa vo qazaa mahki mahki

kis vaaste likkhaa hai hatheli pe miraa naam
main harf-e-ghalat huun to miTaa kyuun nahin dete

ye kis ne kahaa hai miri taqdir banaa de
aa apne hi haathon se miTaane ke liye aa

jab pyaar nahin hai to bhulaa kyuun nahin dete
khat kis liye rakkhe hain jalaa kyuun nahin dete

jhaankte raat ke garebaan se
ham ne sau aaftaab dekhe hain

shor din ko nahin sone detaa
shab ko sannaaTaa jagaa detaa hai

raushni ho rahi hai kuchh mahsus
kyaa shab aakhir tamaam ko pahunchi

shikva-e-zulmat-e-shab se to kahin behtar thaa
apne hisse ki koi shama jalaate jaate

shab ko aa kar vo phir gayaa haihaat
kyaa isi raat ham ko sonaa thaa

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa