ab baanjh zaminon se ummid bhi kyaa rakhnaa — Iqbal Kausar

jis tarah log khasaare mein bahut sochte hain
aaj kal ham tire baare mein bahut sochte hain

tiri pahli diid ke saath hi vo fusun bhi thaa
tujhe dekh kar tujhe dekhnaa mujhe aa gayaa

ziyaan-e-dil hi is baazaar mein sud-e-mohabbat hai
yahaan hai faaeda khud ko agar nuqsaan mein rakh lein

bannaa thaa to bantaa na farishta na khudaa main
insaan hi bantaa miri takmil to ye thi

vo bhi ro ro ke bujhaa Daalaa hai ab aankhon ne
raushni detaa thaa jo ek diyaa andar se

miri khaak us ne bikher di sar-e-rah ghubaar banaa diyaa
main jab aa sakaa na shumaar mein mujhe be-shumaar banaa diyaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi