ziyaan-e-dil hi is baazaar mein sud-e-mohabbat hai — Iqbal Kausar

jis tarah log khasaare mein bahut sochte hain
aaj kal ham tire baare mein bahut sochte hain

tiri pahli diid ke saath hi vo fusun bhi thaa
tujhe dekh kar tujhe dekhnaa mujhe aa gayaa

bannaa thaa to bantaa na farishta na khudaa main
insaan hi bantaa miri takmil to ye thi

vo bhi ro ro ke bujhaa Daalaa hai ab aankhon ne
raushni detaa thaa jo ek diyaa andar se

miri khaak us ne bikher di sar-e-rah ghubaar banaa diyaa
main jab aa sakaa na shumaar mein mujhe be-shumaar banaa diyaa

ab baanjh zaminon se ummid bhi kyaa rakhnaa
roein bhi to laa-haasil boein bhi to kyaa kaaTein

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

mizhgaan-zadan se kam hai zamaan-e-namaaz-e-ishq
ho jaave faut vaqt hi jab tak vazu karein

ye roz DhunDh laae hai ik khub-ru nayaa
shaaki hain apne hi dil-e-aafat-talab se ham

kashish ne ishq ki kyaa kaam kuchh kiyaa thoDaa
hazaar baar to raanjhaa ko laai hiir ke ghar

mere dil-e-shikasta ko kahti hai dekh khalq
kyaa zor-e-aaina hai ye hove agar durust