buDhi maan kaa shaayad lauT aayaa bachpan — Irshad Khan Sikandar

muddaton aankhein vazu karti rahin ashkon se
tab kahin jaa ke tiri diid ke qaabil huaa main

tum ne dekhaa nahin adaakaaron
un kaa chehra mire savaal ke baa'd

saare khvaabon ke intiqaal ke baa'd
aap aur vo bhi itne saal ke baa'd

zamaane par to khul kar hans rahaa thaa
tire chhute hi ro baiThaa hai paagal

hamin tum se hamesha milne aaein kyuun
tumhaare paanv mein mehndi lagi hai kyaa

mujh ko miTTi mein boyaa gayaa
meri miTTi shajar ho gai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa