kis se izhaar-e-muddaaa kiije — Jaun Elia

bin tumhaare kabhi nahin aai
kyaa miri niind bhi tumhaari hai

ek qattaala chaahiye ham ko
ham ye ealaan-e-aam kar rahe hain

chaand ne taan li hai chaadar-e-abr
ab vo kapDe badal rahi hogi

bahut nazdik aati jaa rahi ho
bichhaDne kaa iraada kar liyaa kyaa

ham ajab hain ki us ki baahon mein
shikva-e-naarasaai karte hain

dil ki taklif kam nahin karte
ab koi shikva ham nahin karte

javaani ki duaa laDkon ko naa-haq log dete hain
yahi laDke miTaate hain javaani ko javaan ho kar

'faani' duaa-e-marg ki takraar kyaa zarur
ghaafil nahin ki un se taqaazaa kare koi

haae koi davaa karo haae koi duaa karo
haae jigar mein dard hai haae jigar ko kyaa karun

koi davaa na de sake mashvara-e-duaa diyaa
chaaragaron ne aur bhi dard dil kaa baDhaa diyaa

hai muddaaa-e-ishq hi duniyaa-e-muddaaa
ye muddaaa na ho to koi muddaaa na ho

kyaa balaa thi adaa-e-pursish-e-yaar
mujh se izhaar-e-muddaaa na huaa