Hasrat Mohani

chupke chupke raat din aansu bahana yaad hai
ham ko ab tak ashiqi ka vo zamana yaad hai

munhasir vaqt-e-muqarrar pe mulaqat hui
aaj ye aap ki janib se na.i baat hui

dava-e-ashiqi hai to 'hasrat' karo nibah
ye kya ke ibtida hi men ghabra ke rah ga.e

dilon ko fikr-e-do-alam se kar diya azad
tire junun ka khuda silsila daraz kare

khu samajh men nahin aati tire divanon ki
damanon ki na khabar hai na girebanon ki

kabhi ki thi jo ab vafa kijiyega
mujhe puchh kar aap kya kijiyega

gham-e-aarzu kaa 'hasrat' sabab aur kyaa bataaun
miri himmaton ki pasti mire shauq ki bulandi

raat din naama-o-paighaam kahaan tak doge
saaf kah dijiye milnaa hamein manzur nahin

'hasrat' bahut hai martaba-e-aashiqi buland
tujh ko to muft logon ne mashhur kar diyaa

taasir-e-barq-e-husn jo un ke sukhan mein thi
ik larzish-e-khafi mire saare badan mein thi

ham kyaa karein agar na tiri aarzu karein
duniyaa mein aur bhi koi tere sivaa hai kyaa

chhup nahin sakti chhupaane se mohabbat ki nazar
paD hi jaati hai rukh-e-yaar pe hasrat ki nazar