sach puchho to ham ko hamaari — Jyoti Azad Khatri

main saamne huun abhi guftugu karo mujh se
ki baad mein miri tasvir dekhte rahnaa

dastur hi alag hai tiri bazm-e-naaz kaa
ilzaam de ke kah diyaa ilzaam hi to hai

usi ke chehre pe aankhein hamaari rah jaaein
kisi ko itnaa bhi kyaa dekhnaa zaruri hai

khudaa kaa shukr hai is raabte par
use manzil mujhe rasta banaayaa

tamaam raat main khud se savaal karti rahi
jise chhuaa ho haqiqat mein khvaab kaise huaa

us se baatein to bahut karni thiin par soch liyaa
us ki har baat pe kahnaa hai koi baat nahin

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ret par ik nishaan hai shaayad
ye hamaaraa makaan hai shaayad