usi ke chehre pe aankhein hamaari rah jaaein — Jyoti Azad Khatri

saamne aae binaa us se mukhaatab rahnaa
ek jaadu hai jo aataa hai mujhe sirf mujhe

kabhi dariyaa kabhi sahraa banaayaa
kisi ke ishq ne kyaa kyaa banaayaa

jis ke chehre pe main marti huun sitam to ye hai
us ki tasvir hi album mein mire saath nahin

us se baatein to bahut karni thiin par soch liyaa
us ki har baat pe kahnaa hai koi baat nahin

main saamne huun abhi guftugu karo mujh se
ki baad mein miri tasvir dekhte rahnaa

sach puchho to ham ko hamaari
aankhon ne barbaad kiyaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

ret par ik nishaan hai shaayad
ye hamaaraa makaan hai shaayad

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

aasmaan jhaank rahaa hai 'khaalid'
chaand kamre mein mire utraa hai