jo shakhs na royaa thaa tapti hui raahon mein — Khursheed Rizvi

bas dariche se lage baiThe rahe ahl-e-safar
sabza jaltaa rahaa aur yaad-e-vatan aati rahi

maut ki ek alaamat hai agar dekhaa jaae
ruuh kaa chaar anaasir pe savaari karnaa

jo tamaam umr rahaa sabab ki talaash mein
vo tiri nigaah mein be-sabab nahin aa sakaa

ham teri tabiat ko 'khurshid' nahin samjhe
patthar nazar aataa thaa royaa to bahut royaa

aasaan to nahin apni hasti se guzar jaanaa
utraa jo samundar mein dariyaa to bahut royaa

is e'tiraaf se ras ghul rahaa hai kaanon mein
vo e'tiraaf jo us ne abhi kiyaa bhi nahin

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yaad aai hai to phir TuuT ke yaad aai hai
koi guzri hui manzil koi bhuli hui dost

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain