maut ki ek alaamat hai agar dekhaa jaae — Khursheed Rizvi

ye daur vo hai ki baiThe raho charaagh-tale
sabhi ko bazm mein dekho magar dikhaai na do

aks ne mere rulaayaa hai mujhe
koi apnaa nazar aayaa hai mujhe

tamaam umr akele mein tujh se baatein kiin
tamaam umr tire ru-ba-ru khamosh rahe

do harf tasalli ke jis ne bhi kahe us ko
afsaana sunaa Daalaa tasvir dikhaa Daali

hain miri raah kaa patthar miri aankhon kaa hijaab
zakhm baahar ke jo andar nahin jaane dete

jo shakhs na royaa thaa tapti hui raahon mein
divaar ke saae mein baiThaa to bahut royaa

kyon tasavvur mein ji rahaa huun main
jab haqiqat mein mar hi jaanaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

laakh chaahaa ki ho pahchaan koi apni bhi
kaash ham aap ke hi naam se jaane jaate

khuub gahri jo lagi choT to ham ne jaanaa
vaqt lagtaa hai kisi dard ko jaate jaate