ishtiyaaq-e-raqs mein had se nikalte jaa rahe — Latif Shah Shahid

khud apne aap se rahtaa hai aadmi naaraaz
udaasiyon ke bhi apne mizaaj hote hain

mujh se to koi taaj-mahal bhi na ban sakaa
be-naam dil ki qabr mein dafnaa diyaa tujhe

chhiDkaa gayaa hai zahr fazaaon mein is tarah
maaon ne apni kokh se buDhe janam diye

gardish-e-ayyaam se chalti hai nabz-e-kaaenaat
vaqt kaa pahiya rukaa to zindagi ruk jaaegi

taaza havaa kharidne aate hain gaanv mein
'shaahid' shahar ke log bhi kaise ajiib hain

ye aur baat ki tu do qadam pe bhuul gayaa
hamein to hashr talak teraa intizaar rahaa

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

garmi se muztarib thaa zamaana zamin par
bhun jaataa thaa jo girtaa thaa daanaa zamin par

kuchh arz-e-tamannaa mein shikva na sitam kaa thaa
main ne to kahaa kyaa thaa aur aap ne kyaa jaanaa

ghairon ko bhalaa samjhe aur mujh ko buraa jaanaa
samjhe bhi to kyaa samjhe jaanaa bhi to kyaa jaanaa

ek din aage hi duniyaa se uThaanaa ham ko
shab-e-furqat tu ilaahi na dikhaanaa ham ko