Latif Shah Shahid

khud apne aap se rahtaa hai aadmi naaraaz
udaasiyon ke bhi apne mizaaj hote hain

mujh se to koi taaj-mahal bhi na ban sakaa
be-naam dil ki qabr mein dafnaa diyaa tujhe

chhiDkaa gayaa hai zahr fazaaon mein is tarah
maaon ne apni kokh se buDhe janam diye

gardish-e-ayyaam se chalti hai nabz-e-kaaenaat
vaqt kaa pahiya rukaa to zindagi ruk jaaegi

taaza havaa kharidne aate hain gaanv mein
'shaahid' shahar ke log bhi kaise ajiib hain

baandh ke ahd-e-vafaa log chale jaate hain
chhoD jaate hain faqat jism ki uljhi gaanThein

vo mujh se pyaar kab kartaa hai bas miltaa milaataa hai
kiraae ke makaan mein kab koi paudaa lagaataa hai

mujhe khaamoshiyaan paDhne kaa fan aataa to paDh letaa
tumhaari jhiil si khaamosh aankhon ki pashemaani

rail ki paTri fasurda shaam teraa suitcase
phir se aankhon mein tire jaane kaa manzar aa gayaa

paDhtaa hai baDe shauq se vo meri kitaabein
jis baat se Dartaa huun vahi baat na paDh le

dusron ki baat aai to payambar thaa vo shakhs
apni baari par mohabbat se hi murtad ho gayaa

gham ko ehsaas ki miTTi mein khudaa ne gundhaa
aur kuchh ashk milaae to phir insaan kiyaa