mujh jaise darvesh tumhaari duniyaa mein — Mohammad Mustahsan Jami

rang badlaa huaa thaa phulon kaa
tum yaqinan udaas guzre the

bin dekhe bhi chain nahin hai 'mustahsan'
dekhun to saari binaai jaati hai

tiri lab-kushaai pe munhasir miri zindagaani hai dostaa
tiraa bolnaa bhi qubul hai tiri khaamushi bhi aziiz hai

lutf ki in pe koi khaas nazar hai ki nahin
apne maston ki koi khair-khabar hai ki nahin

sivaae is ke koi bhi masrufiyat nahin hai
main in dinon bas charaagh taqsim kar rahaa huun

ham talvaar uThaa nahin paae
ham aavaaz uThaa sakte the

banaa kar faqiron kaa ham bhes 'ghaalib'
tamaashaa-e-ahl-e-karam dekhte hain

faqiron ke gharon mein lutf ki raatein bhi aati hain
ziyaarat ke liye aksar musammaatein bhi aati hain

mandir gae masjid gae piron faqiron se mile
ik us ko paane ke liye kyaa kyaa kiyaa kyaa kyaa huaa

shaikh mujh ko na Daraa apni musalmaani thaam
ham faqiron kaa kisi rang se imaan na jaae

dil de na de magar ye tiraa husn-e-be-misaal
vaapas na kar faqir ko aakhir badan to hai

jannat-e-sufiyaa nisaar dahr ki musht-e-khaak par
aashiq-e-arz-e-paak ko daavat-e-laa-makaan na de