Shayari Of Bashir Badr

dushmanī jam kar karo lekin ye gunjā.ish rahe
jab kabhī ham dost ho jaa.eñ to sharminda na hoñ

kuchh to majbūriyāñ rahī hoñgī
yuuñ koī bevafā nahīñ hotā

ham bhī dariyā haiñ hameñ apnā hunar mālūm hai
jis taraf bhī chal paḌeñge rāsta ho jā.egā

musāfir haiñ ham bhī musāfir ho tum bhī
kisī moḌ par phir mulāqāt hogī

zindagī tū ne mujhe qabr se kam dī hai zamīñ
paañv phailā.ūñ to dīvār meñ sar lagtā hai

baḌe logoñ se milne meñ hamesha fāsla rakhnā
jahāñ dariyā samundar se milā dariyā nahīñ rahtā

jis din se chalā huuñ mirī manzil pe nazar hai
āñkhoñ ne kabhī miil kā patthar nahīñ dekhā

koī haath bhī na milā.egā jo gale miloge tapāk se
ye na.e mizāj kā shahr hai zarā fāsle se milā karo

yahāñ libās kī qīmat hai aadmī kī nahīñ
mujhe gilās baḌe de sharāb kam kar de

har dhaḌakte patthar ko log dil samajhte haiñ
umreñ biit jaatī haiñ dil ko dil banāne meñ

mohabbatoñ meñ dikhāve kī dostī na milā
agar gale nahīñ miltā to haath bhī na milā

ujāle apnī yādoñ ke hamāre saath rahne do
na jaane kis galī meñ zindagī kī shaam ho jaa.e