ye dil ajiib hai aksar kamaal kartaa hai — Pinhaan

ye parinde jo munDeron pe khuli dhuup mein hain
baal-o-par apne sukhaaeinge chale jaaeinge

khvaab dekhe the TuuT kar main ne
TuuT kar khvaab dekhte hain mujhe

patthar na banaa de mujhe mausam ki ye sakhti
mar jaaein mire khvaab na taabir ke Dar se

main shar ki sharaarat se to hoshyaar huun lekin
allaah bachaae to bachun khair ke shar se

shaam ki chaae kaa vaada vo udhar bhuul gae
ham idhar subh se tayyaar hue baiThe hain

main baDaa ho gayaa huun magar bachpanaa
mere dil se kabhi bhi gayaa hi nahin

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

dil-e-haris hi apnaa na ho sakaa qaane
vagarna tere karam mein to kuchh kami na rahi

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

chaand ne taan li hai chaadar-e-abr
ab vo kapDe badal rahi hogi