khvaab dekhe the TuuT kar main ne — Pinhaan

ye parinde jo munDeron pe khuli dhuup mein hain
baal-o-par apne sukhaaeinge chale jaaeinge

ye dil ajiib hai aksar kamaal kartaa hai
javaab jin kaa nahin vo savaal kartaa hai

patthar na banaa de mujhe mausam ki ye sakhti
mar jaaein mire khvaab na taabir ke Dar se

main shar ki sharaarat se to hoshyaar huun lekin
allaah bachaae to bachun khair ke shar se

shaam ki chaae kaa vaada vo udhar bhuul gae
ham idhar subh se tayyaar hue baiThe hain

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

duniyaa hai khvaab haasil-e-duniyaa khayaal hai
insaan khvaab dekh rahaa hai khayaal mein

kahaani hai to itni hai fareb-e-khvaab-e-hasti ki
ki aankhein band hon aur aadmi afsaana ho jaae

ab vahaan daaman-kashi ki fikr daaman-gir hai
ye mire khvaab-e-mohabbat ki nai taabir hai