yahi hai rasm-e-zamaana to phir gila kaisaa — Qasri Kanpuri

koi manzil ke qarib aa ke bhaTak jaataa hai
koi manzil pe pahunchtaa hai bhaTak jaane se

aap haq-goi ki jo chaahein sazaa dein mujh ko
aap khud jaise hain vaisaa hi kahaa hai main ne

ye kaun shakhs hai is ko zaraa bulaao to
ye mere haal pe kyuun muskuraa ke guzraa hai

ghalat hai aap kaa andaaza-e-nazar 'qasri'
buraa zarur huun par is qadar buraa bhi nahin

apne kaandhon se uThaae hue haalaat kaa bojh
raaste chikh paDe log jidhar se guzre

jab se ik shakhs mere dhyaan mein hai
kitni khushbu mire makaan mein hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa