yaaro ye daur zof-e-basaarat kaa daur hai — Qateel Shifai

abhi to baat karo ham se doston ki tarah
phir ikhtilaaf ke pahlu nikaalte rahnaa

aakhri hichki tire zaanun pe aae
maut bhi main shaairaana chaahtaa huun

apne haathon ki lakiron mein sajaa le mujh ko
main huun teraa tu nasib apnaa banaa le mujh ko

nikal kar dair-o-kaaba se agar miltaa na but-khaana
to Thukraae hue insaan khudaa jaane kahaan jaate

kyuun sharik-e-gham banaate ho kisi ko ai 'qatil'
apni suuli apne kaandhe par uThaao chup raho

ab jis ke ji mein aae vahi paae raushni
ham ne to dil jalaa ke sar-e-aam rakh diyaa

jab ki pahlu se yaar uThtaa hai
dard be-ikhtiyaar uThtaa hai

matruk raaston pe palaT aane kaa khayaal
'haidar-husain’ yaar bahut der ho gai

ye dushmani hai saaqi yaa dosti hai saaqi
auron ko jaam denaa mujh ko dikhaa dikhaa ke

jin hauslon se meraa junun mutmain na thaa
vo hausle zamaane ke meyaar ho gae

dayaar-e-sajda mein taqlid kaa rivaaj bhi hai
jahaan jhuki hai jabin un kaa naqsh-e-paa to nahin

ham ahl-e-dil ne meayaar-e-mohabbat bhi badal Daale
jo gham har fard kaa gham hai usi ko gham samajhte hain