Qateel Shifai

rahegā saath tirā pyaar zindagī ban kar
ye aur baat mirī zindagī vafā na kare

subūt-e-ishq kī ye bhī to ek sūrat hai
ki jis se pyaar kareñ us pe tohmateñ bhī dhareñ

kis tarah apnī mohabbat kī maiñ takmīl karūñ
ġham-e-hastī bhī to shāmil hai ġham-e-yār ke saath

apnī zabāñ to band hai tum ḳhud hī soch lo
paḌtā nahīñ hai yūñhī sitam-gar kisī kā naam

gungunātī huī aatī haiñ falak se būñdeñ
koī badlī tirī pāzeb se Takrā.ī hai

raqs karne kā milā hukm jo dariyāoñ meñ
ham ne ḳhush ho ke bhañvar bāñdh liyā paañv meñ

husn ko chāñd javānī ko kañval kahte haiñ
un kī sūrat nazar aa.e to ġhazal kahte haiñ

sitam to ye hai ki vo bhī na ban sakā apnā
qubūl ham ne kiye jis ke ġham ḳhushī kī tarah

nikal kar dair-o-ka.aba se agar miltā na but-ḳhāna
to Thukrā.e hue insāñ ḳhudā jaane kahāñ jaate

kyā maslahat-shanās thā vo aadmī 'qatīl'
majbūriyoñ kā jis ne vafā naam rakh diyā

be-ābrū na thī koī laġhzish mirī 'qatīl'
maiñ jab girā jahāñ bhī girā hosh meñ girā

uf vo marmar se tarāshā huā shaffāf badan
dekhne vaale use tāj-mahal kahte haiñ