mahv yuun ho gae alfaaz-e-duaa vaqt-e-duaa — Salik Lakhnavi

aaj bhi hai vahi maqaam aaj bhi lab pe un kaa naam
manzil-e-be-shumaar-gaam apne safar ko kyaa karun

dil ne siine mein kuchh qaraar liyaa
jab tujhe khuub saa pukaar liyaa

mai-khaana-e-hasti mein saaqi ham donon hi mujrim hain shaayad
khum tu ne bachaa ke rakkhe the paimaane main ne toDe hain

apni khuddaari salaamat dil kaa aalam kuchh sahi
jis jagah se uTh chuke hain us jagah phir jaaein kyaa

miT chuke jo bhi the tauba-shikani ke asbaab
ab na mai-khaana na paimaana na shisha na subu

bahaar-e-gulistaan ham ko na pahchaane taajjub hai
gulon ke rukh pe chhiDkaa hai bahut khun-e-jigar ham ne

kyuun nahin hote munaajaaton ke maani munkashif
ramz ban jaataa hai kyuun harf-e-duaa ham se suno

muddaaa izhaar se khultaa nahin hai
ye zabaan-e-be-zabaani aur hai

barson se khaDaa huun haath uThaae
taasir-e-duaa kaa muntazir huun

bahan ki iltijaa maan ki mohabbat saath chalti hai
vafaa-e-dostaan bahr-e-mashaqqat saath chalti hai

yahi duaa hai vo meri duaa nahin suntaa
khudaa jo hotaa agar kyaa khudaa nahin suntaa

baat kyuun khoein iltijaa kar ke
tum se ummid-e-iltifaat nahin