sunaa hai dhuup ko ghar lauTne ki jaldi hai — Sardar Asif

aataa rahaa huun yaad main us ko tamaam umr
is zaaviye se ishq mein naakaam kab huaa

koi shikva nahin ham ko kisi se
khud apni zaat ham ko chhal rahi hai

ye kaise marhale mein phans gayaa hai meraa ghar maalik
agar chhat ko bachaa bhi luun to phir divaar jaati hai

main tujh se jhuk ke milaa huun magar ye dhyaan rahe
baDaa nahin huun magar tujh se qad mein kam bhi nahin

ghazal kahne mein yuun to koi dushvaari nahin hoti
magar ik masala ye hai ki meyaari nahin hoti

main khud ko dekhun agar dusre ki aankhon se
mileingi khaamiyaan apne hi shah-kaaron mein

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge

gul kiyaa jis ne vo thaa aur magar
shama ne shikva havaaon se kiyaa

ghazal mein jab talak ehsaas ki shiddat na ho shaamil
faqat alfaaz ki kaarigari mahsus hoti hai

kisi akeli shaam ki chup mein
giit puraane gaa ke dekho

kis tarah khush hon shaam ko vo chaand dekh kar
aataa nahin hai mashal-e-mah kaa dhuaan pasand