fikr o ehsaas ke tapte hue manzar tak aa — Sardar Saleem

kuchh aisaa ho ki tasviron mein jal jaae tasavvur bhi
mohabbat yaad aaegi to shikve yaad aaeinge

baadshaahat ke maze hain khaaksaari mein 'salim'
ye nazaara yaar ke kuche mein rah ke dekhnaa

nuur ki shaakh se TuuTaa huaa pattaa huun main
vaqt ki dhuup mein maadum huaa jaataa huun

vaqt ke sahraa mein nange paanv Thahre ho 'salim'
dhuup ki shiddat yakaayak baDh na jaae chal paDo

aaj divaane kaa zauq-e-did puuraa ho gayaa
tujh ko dekhaa aur us ke baa'd andhaa ho gayaa

'ghaalib'-e-daanaa se puchho ishq mein paD kar salim
ek maaqul aadmi kaise nikammaa ho gayaa

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maango samundaron se na saahil ki bhiik tum
haan fikr o fan ke vaaste gahraai maang lo

bagulaa jin ke sar par chatr-e-shaahi hai zamin masnad
vahi aqlim-e-gham mein aah ki naubat bajaate hain

us ke rukhsaar pe hai aur tire honT pe til
tilmilaane ki ijaazat nahin di jaaegi

vo ajab ghaDi thi main jis ghaDi liyaa dars nuskha-e-ishq kaa
ki kitaab aql ki taaq par juun dhari thi tyuun hi dhari rahi