kaafir-e-ishq huaa jab se main is dahr mein huun — Shah Aasim

hai ayaan ru-e-yaar aankhon mein
chhaai hai kyaa bahaar aankhon mein

aaina le ke dekh zaraa apne husn ko
aaegi ye bahaar-e-gulistaan khizaan mein yaad

laa-makaan hai vaaste un ki maqaam-e-bud-o-baash
go ba-zaahir kahne ko kalkatta aur lahore hai

islaam aur kufr hamaaraa hi naam hai
kaaba kunisht donon mein apnaa maqaam hai

dekh kar mujh ko tujhe kyuun hai tahayyur naaseh
mashrab-e-ishq hai ye mazhab-e-islaam nahin

uTThi hai jab se dil mein mire ishq ki tarang
shaadi o gham hain aage mire donon ek rang

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ab miri baat jo maane to na le ishq kaa naam
tu ne dukh ai dil-e-naakaam bahut saa paayaa

ik dard-e-mohabbat hai ki jaataa nahin varna
jis dard ki DhunDe koi duniyaa mein davaa hai

maqsud hai aaankhon se tiraa dekhnaa pyaare
jab tu hi na ho paas to kis kaam ki aanhkein

dil hi dil mein yaan mohabbat apnaa ghar karti rahi
ham rahe ghaafil vo sau TukDe jigar karti rahi