har kone se teri khushbu aaegi — Shakeel Jamali

zindagi aise bhi haalaat banaa deti hai
log saanson kaa kafan oDh ke mar jaate hain

sab se pahle dil ke khaali-pan ko bharnaa
paisa saari umr kamaayaa jaa saktaa hai

apne khuun se itni to ummidein hain
apne bachche bhiiD se aage nikleinge

umr kaa ek aur saal gayaa
vaqt phir ham pe khaak Daal gayaa

jhuuT mein shak ki kam gunjaaish ho sakti hai
sach ko jab chaaho jhuThlaayaa jaa saktaa hai

abhi raushan huaa jaataa hai rasta
vo dekho ek aurat aa rahi hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

utar gayaa hai rag-o-pai mein zaaiqa us kaa
ajiib shahad saa kal raat us zabaan mein thaa

kitaabon se nikal kar titliyaan ghazlein sunaati hain
tiffin rakhti hai meri maan to basta muskuraataa hai

milaa thaa hijr ke raste mein subh ki maanind
bichhaD gayaa thaa musaafir se raat hone tak