sab se pahle dil ke khaali-pan ko bharnaa — Shakeel Jamali

zindagi aise bhi haalaat banaa deti hai
log saanson kaa kafan oDh ke mar jaate hain

apne khuun se itni to ummidein hain
apne bachche bhiiD se aage nikleinge

har kone se teri khushbu aaegi
har sanduq mein tere kapDe nikleinge

umr kaa ek aur saal gayaa
vaqt phir ham pe khaak Daal gayaa

jhuuT mein shak ki kam gunjaaish ho sakti hai
sach ko jab chaaho jhuThlaayaa jaa saktaa hai

abhi raushan huaa jaataa hai rasta
vo dekho ek aurat aa rahi hai

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

chhiDaa jab un ke ghar jhagDaa to un ki aql chakraai
jo suljhaate rahe the umr-bhar baazaar kaa jhagDaa

tamaam umr tiri ham-rahi kaa shauq rahaa
magar ye ranj ki main mauja-e-sabaa na huaa

hijr ke daur mein har daur ko shaamil kar lein
is mein shaamil yahi ik umr-e-gurezaan kyuun hai