kuchh na hone kaa gumaan thaa phir bhi — Sharar Fatehpuri

us sitam pesha kaa eajaaz-e-sitam hi hogaa
dast-e-qaatil ko agar dast-e-masihaa likkhun

maslahat thi koi vo chup the agar
bolne vaale to khul kar bolte

un se 'sharar' kuchh aise bichhDe
jivan kaa har sapnaa bikhraa

mere hi khuun mein nahlaa ke 'sharar'
vo salibon pe sajaa degaa mujhe

kyaa thi vo dair-o-haram ki duniyaa
jo bhi duniyaa kaa khudaa thaa kyaa thaa

be-hisi vo hai ki is daur mein jiine kaa mazaa
na gunaahon mein rahaa aur na savaabon mein rahaa

ret par ik nishaan hai shaayad
ye hamaaraa makaan hai shaayad

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae