patthar to hazaaron ne maare the mujhe lekin — Sohail Azeemabadi

kyaa lutf hai aise jiine kaa jis ki na kisi ko parvaa ho
kis kaam kaa marnaa vo marnaa jis kaa ki kisi ko gham na huaa

khaak uchhaalo jo zamin par to falak par gir jaae
ab khulaa ye ki bahut past hai himmat meri

vo raatein kaif mein Duubi vo teri pyaar ki baatein
nikal paDte hain aansu jab kabhi ham yaad karte hain

ai hasrat-e-dil go vasl huaa par shauq hamaaraa kam na huaa
jis se ki khalish kuchh aur baDhe vo zakhm huaa marham na huaa

vo kaun dil hai jahaan mein kah duun jise ki ye aap kaa nahin hai
ghazab to ye hai ki meraa dil hai magar miraa ham-navaa nahin hai

kyaa gham hai jo ham gumnaam rahe tum to na magar badnaam hue
achchhaa hai ki mere marne par duniyaa mein miraa maatam na huaa

jab ki pahlu se yaar uThtaa hai
dard be-ikhtiyaar uThtaa hai

chaahiye rang-e-taghazzul bhi ghazal mein pyaare
shaairi naam nahin qaafiya-paimaai kaa

shaam Dhalne se faqat shaam nahin Dhalti hai
umr Dhal jaati hai jaldi palaT aanaa mire dost

hijr insaan ke khad-o-khaal badal detaa hai
kabhi fursat mein mujhe dekhne aanaa mire dost

dost-daari ke saliqe se bahut vaaqif huun
ab mujhe haath milaane kaa hunar aataa hai

kise kahein ki rifaaqat kaa daagh hai dil par
bichhaDne vaalaa to khul kar kabhi milaa hi na thaa