yuun apne aap ko barbaad kartaa hai koi — Tarkash Pradeep

tujhe gale se lagaa ke bhi dekhaa jaaegaa
abhi to mujh ko tiraa intizaar karnaa hai

husn hotaa hai kisi shai kaa koi apnaa hi
aur phir dekhne vaale ki nazar hoti hai

banaataa huun main tasavvur mein us kaa chehra magar
har ek baar nai kaaenaat banti hai

aur bhaTkeinge to kuchh aur nayaa dekheinge
ham to aavaara parinde hain hamaaraa kyaa hai

ham to kahte hain mohabbat mein mazaa hai hi nahin
aap kahte hain to phir maan liyaa jaataa hai

ab to main aur bhi buraa huun ki
ab ziyaada sudhar gayaa huun main

main baDaa ho gayaa huun magar bachpanaa
mere dil se kabhi bhi gayaa hi nahin

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

'saif' andaaz-e-bayaan rang badal detaa hai
varna duniyaa mein koi baat nai baat nahin

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein