baDhte chale gae jo vo manzil ko paa gae — Umair Manzar

banaa ke vahm o gumaan ki duniyaa haqiqaton ke saraab dekhun
main apne hi aaine mein khud ko jahaan bhi dekhun kharaab dekhun

ye to sach hai ki vo sitamgar hai
dar par aayaa hai to amaan mein rakh

tazkira ho tiraa zamaane mein
aisaa pahlu koi bayaan mein rakh

is mahfil mein main bhi kyaa bebaak huaa
aib o hunar kaa saaraa parda chaak huaa

sunaa ye thaa bahut aasuda hain saahil ke baashinde
magar TuuTi hui kashti mein dariyaa paar honaa thaa

saathi mire kahaan se kahaan tak pahunch gae
main zindagi ke naaz uThaane mein rah gayaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yaad aai hai to phir TuuT ke yaad aai hai
koi guzri hui manzil koi bhuli hui dost

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa