main kis tarah tujhe ilzaam-e-bevafaai duun — Unwan Chishti

ishq phir ishq hai aashufta-sari maange hai
hosh ke daur mein bhi jaama-dari maange hai

— Unwan Chishti

pareshaan ho ke dil tark-e-taalluq par hai aamaada
mohabbat mein ye surat bhi na raas aai to kyaa hogaa

— Unwan Chishti

vo haadse bhi dahr mein ham par guzar gae
jiine ki aarzu mein kai baar mar gae

— Unwan Chishti

aap se chuuk ho gai shaayad
aap aur mujh pe mehrbaan kyaa khuub

— Unwan Chishti

miri samajh mein aa gayaa har ek raaz-e-zindagi
jo dil pe choT paD gai to duur tak nazar gai

— Unwan Chishti

rahne de taklif-e-tavajjoh dil ko hai aaraam bahut
hijr mein teri yaad bahut hai gham mein teraa naam bahut

— Unwan Chishti

yaar main itnaa bhukaa huun
dhokaa bhi khaa letaa huun

— Aks Samastipuri

mere baa'd vafaa kaa dhokaa aur kisi se mat karnaa
gaali degi duniyaa tujh ko sar meraa jhuk jaaegaa

— Qateel Shifai

kuchh to majburiyaan rahi hongi
yuun koi bevafaa nahin hotaa

— Bashir Badr

is qadar musalsal thiin shiddatein judaai ki
aaj pahli baar us se main ne bevafaai ki

— Ahmad Faraz

ek parda saa hai fareb-e-nazar
ye bhi uTThe to dekhnaa kyaa hai

— Soz Hoshiarpuri

zaahid tiraa to diin saraasar fareb hai
rishte se tere subha ke zunnaar hi bhalaa

— Taban Abdul Hai