vo haadse bhi dahr mein ham par guzar gae — Unwan Chishti

is kaar-e-numaayaan ke shaahid hain chaman vaale
gulshan mein bahaaron ko laae the hamin pahle

main kis tarah tujhe ilzaam-e-bevafaai duun
rah-e-vafaa mein tire naqsh-e-paa bhi milte hain

pareshaan ho ke dil tark-e-taalluq par hai aamaada
mohabbat mein ye surat bhi na raas aai to kyaa hogaa

aap se chuuk ho gai shaayad
aap aur mujh pe mehrbaan kyaa khuub

ishq phir ishq hai aashufta-sari maange hai
hosh ke daur mein bhi jaama-dari maange hai

miri samajh mein aa gayaa har ek raaz-e-zindagi
jo dil pe choT paD gai to duur tak nazar gai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

kabhi khauf thaa tire hijr kaa kabhi aarzu ke zavaal kaa
rahaa hijr-o-vasl ke darmiyaan tujhe kho sakaa na main paa sakaa

main nigaah-e-paak se dekhe thaa tire husn-e-paak ko is pe bhi
mire ji mein khvaahish-e-vasl thi tire dil mein bos-o-kanaar thaa

kyaa kyaa na pyaas jaage mire dil ke dasht mein
hasrat bhi ek aag hai laage jo raat bhar

chhup nahin sakti chhupaane se mohabbat ki nazar
paD hi jaati hai rukh-e-yaar pe hasrat ki nazar

shauq-e-sharaab khvaahish-e-jaam-o-subu nahin
hai sab haraam jab se ki pahlu mein tu nahin