ishq phir ishq hai aashufta-sari maange hai — Unwan Chishti

is kaar-e-numaayaan ke shaahid hain chaman vaale
gulshan mein bahaaron ko laae the hamin pahle

main kis tarah tujhe ilzaam-e-bevafaai duun
rah-e-vafaa mein tire naqsh-e-paa bhi milte hain

pareshaan ho ke dil tark-e-taalluq par hai aamaada
mohabbat mein ye surat bhi na raas aai to kyaa hogaa

vo haadse bhi dahr mein ham par guzar gae
jiine ki aarzu mein kai baar mar gae

aap se chuuk ho gai shaayad
aap aur mujh pe mehrbaan kyaa khuub

miri samajh mein aa gayaa har ek raaz-e-zindagi
jo dil pe choT paD gai to duur tak nazar gai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ik samt ghar ke log hain ik samt 'ishq hai
ai naujavaan laDki himaaqat ki baat hai

jin se mil kar zindagi se ishq ho jaae vo log
aap ne shaayad na dekhe hon magar aise bhi hain

mere taaviz mein jo kaaghaz hai
us pe likkhaa hai mohabbat karnaa

dekhaa hai mohabbat ko ibaadat ki nazar se
nafrat ke avaamil hamein maayub rahe hain