pople munh se chane khaanaa nahin mumkin huzur — Zafar Kamali

jo baiThaa hai bagulaa bhagat ki tarah
vahi ham ko asli shikaari lage

shauharon se bibayaan laDti hain chhaapa-maar jang
raabta un kaa bhi kyaa kashmir ki vaadi se hai

jo apnaa bhaai hai rahtaa hai vo paanv ki Thokar mein
magar joru kaa bhaai to gale kaa haar hotaa hai

ye rishvat ke hain paise din mein kaise luun musalmaan huun
main le saktaa nahin sar apne ye ilzaam roze mein

vo masjid ho ki mandir ho adab ho yaa siyaasat ho
vahi hai jang kursi ki vahi dastaar kaa jhagDaa

vahi suluk zamaane ne mere saath kiyaa
kiyaa thaa jaisaa musharraf ne be-nazir ke saath

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

jangalon mein kahin kho jaanaa hai
jaanvar phir mujhe ho jaanaa hai

bhuul jaanaa thaa jise sabt hai dil par mere
yaad rakhnaa thaa jise us ko bhulaa baiThaa huun

rang khushbu aur mausam kaa bahaanaa ho gayaa
apni hi tasvir mein chehra puraanaa ho gayaa

bahut hain sajda-gaahein par dar-e-jaanaan nahin miltaa
hazaaron devtaa hain har taraf insaan nahin miltaa